باحلـــم بقلم / سمير الزيات

باحلـــم
بقلم / سمير الزيات 
ـــــــــــ
باحلم لكل البشر
بالحب سيل مجنون
واحلم بإيد القدر
بالخير تلف الكون
والأرض تطرح أمل
يملا الحياة بساتين
وورود جميلة تغني
للندى غنوة
نشوانة زي الهوى
وبسمته الحلوة
***
باحلم بإبني بيبني
ويعلِّي ف البنيان
باحلم بطيفه ف حضني
ودا حلم ف الوجدان
مسجون وعايش ف وهمي
والأمر للسجّان
وان قلت أستنى حلمي
أغرق مع الأحزان
***
باحلم بروح السلام
ع الأرض بترفرف
وتطير قلوب الحمام
فرحانة بتهفهف
والناس ف كل البلاد
تحصد أمانيها
وتقول قلوب الولاد
أحلى أغانيها
***
باحلم لكل الوجود
بالحب مهما يكون
واحلم بإيد السلام
بتحضن الملايين
واصرخ ف وش النهار
ليه الحروب والدمار
د النار بتحرق وتاكل
حتى ف قلوب الصغار
***
سمير عبد الرءوف الزيات
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
abuiyad