إبن الشوارع (عامية)
ماشي متلطم في كل شارع وكل حارة
وتشوفني ماسك فوطة زفرة في موقف أو إشارة
وتبصلي كأني حقير لما امسح إزازك
مين الحقير؟ اللي الزمن باع طفولته بخسارة
مين الحقير؟ وتعرف إيه عن الحقارة؟
....
جرب تنام من غير عشا لو بس ليلة
جرب تنام من غير غطا ف ليلة شتا طويلة
جرب كدة تاخد جنيه وتصرف بيه علي عيلة
جرب أبصلك لو ثانية نظرة حقيرة ذليلة
أنا عمري مخترت التشرد يبقي ليا وسيلة
....
لو كنت فاكر الجنيه بتاعك بيحييني
مكنش حالي نومة تحت الكوبري تهريني
البرد بينهش في جتتي والجوع بيقطع في مصاريني
و لا إنت فاكر عضم جسمي من برد الشتا هيحميني
قول للجنيه بتاعك في ليل الشتا يغطيني
....
خليه يغطيني قبل المطر ميغرق مكاني
يبقي أنت وفر نظرتك وانساني
وسيبني لجرح الوطن اللي رماني
واحمد كمان ربنا أن إنت إبنك مش مكاني
واللي انا عايزك تعرفه....,
والله مخترت الشوارع تبقي عنواني
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
:))
;))
;;)
:D
;)
:p
:((
:)
:(
=((
=))
:-*
:x
b-(
:-t
8-}
0 التعليقات: