المواطن مخلص أمين .... بقلم الشاعر / مصطفى رزق في 8:06:00 م مرسلة بواسطة مجلة الأدباء والشعراء العرب

بقلم الشاعر / مصطفى رزق

 

المواطن مُخلص أمين
_________________

عشت فى بلادى,
كأنى ساكن...
... " فى شقة قديمة بإيجار جديد "
علشان رغيف,
فى الصف راكن...
" وفى شغلى لازم بألف ايد "
مصالحى يوقفها,
أمين مخازن...
" وفوت علينا بكرة يا عيد "
بطلب حقى فى,
هدوء ولكن...
" الرد شتايم, واسمعه فى نشيد "
وعلى طول الهم,
فى قلبى خازن...
" ولا عشت يوم مبسوط وسعيد "
معذور يا ناس,
ما البيه مواطن...
" ولو اشتكيت, رحت فى حديد "

وقبل ما تشكى,
لازم تدفع!...
" والحق بدرى قبل ما يرخص "
صابر وراضى,
وياريت يشفع...
" واعمل ايه, لو الصبر يخلص؟ّ! "
مظلوم ياهوه,
ومين يسمع...
" كان ذنبى ايه غير انى مُخلص! "

على هذا الحال,
وتفوت سنين...
" وعندى صبر قوى ومتين "
وقلبى قادر,
على نار القهر...
" ساعتين فى فرن, ويطلع عجين "
لا عمرى بشكى,
ولا ألطم جبين...
" أنا المواطن...مُخلص أمين "

تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا

abuiyad