أوبريت ولادي تفرقوا
مساء الخير مالك في ايه يا أم حسين
في ايه بس مال دموعك كده مالية العين
حصل أيه طمنيني قلقتيني وإحنا صايمين
في أيه اتكلمي فاضل ع المغرب ساعتين
وفين ولادي حبايبي مش شايفهم قاعدين
فين حسين وجلال ومها وأمير وياسين
وحشوني وكأني ما شفتهومش من سنين
*******
ولادك خلاص اتفرقوا وكل واحد وله طريق
بقوا زي الفراش اللي رايح على نور الحريق
وبيحفروا بحر غويط اللي يقع فيه يموت غريق
وكل واحد فيهم شايف نفسه بس هو البريء
كل واحد فيهم شايف ان فريقه أحسن فريق
هو اللي يقدر يرجع مصر لمجد الإسلام العريق
وانه يقدر يحول من الصفيح دهب وله بريق
********
قلقتيني اتكلمي بسرعة في ايه بس يا وداد
اتكلمي وقوليلي حصل ايه قلقتيني ع الولاد
أنا سايبهم الصبح بكل خير صايمين وشداد
ازاى أتفرقوا وانا علمتهم القوة في الاتحاد
عودتهم ع الحب والخير مش ع الغل والأحقاد
وعلى حب الناس ومفيش فرق بين أحمد وميلاد
ولادي بخير اطمني ما تقلقيش عليهم يا وداد
ولادي ميتفرقوش حتى لو كانوا في عشر بلاد
***
يا محمد اصبر وافهمني وسبني أكمل حديثي
اتفرقوا بالفكر وعمى الفكر أصعب م العمى الحيثي
حسين بيقول أنا أخواني ومرسي ده هو رئيسي
وجلال مهووس بالثورة وشايل دايماً صور السيسي
ومها بتقول نفسي السيسي يكون دا عريسي
وأمير قال انا مالي ومال ثورة وأخوان يا عزيزي
وكل شوية واجع دماغنا فين برفاني فين قميصي
وياسين دايماً قاعد ع الكنبة ويقولها انت ونيسي
ويقول خايف على مصر من أحلامي ومن كوابيسي
****
امبارح أخويا علي قالي كل بيت في مصر انقسم
والغربان عششت فيها والحزن على الوشوش اترسم
والإيمان ضاع من القلوب والشيطان هلل وابتسم
وعنوان الأمان ضاع منا والخوف على قلوبنا جثم
وكل واحد عاجبه عقله والغباء في العقول اتوسم
اللي يقول شرعية وشريعة وراح على رابعة اعتصم
واللي يقول دي ثورة شعب والأمر خلاص اتحسم
يا خوفي من طفل الفوضى اللي كبر خلاص وانفطم
****
ولادنا خلاص اتفرقوا وازاى نقدر تاني نلمهم
تعابين وأفاعي اتلمت عليهم ولازم نكسر سمهم
خلي حسين يرجع من رابعة ويسيب للناس حيهم
اتصل بأمير يرجع من التحرير يلا يا محمد لمهم
لازم يفهموا أن مصر الأول قبل أبوهم وأمهم
وميكونوش لغيرهم سلاح يستنزف منهم دمهم
وميخلوش الشيطان متحدث رسمي عنهم
عاوزين مصر نجمة عالية في سما دنيا حبهم
وكفاية فرقة وانقسام ويشوفوا بقا شغلهم
ويعتصموا بحبل الله مايتفرقوا ومصر لهم كلهم
الشاعر / طارق فوزي
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المدونة وشكرا
:))
;))
;;)
:D
;)
:p
:((
:)
:(
=((
=))
:-*
:x
b-(
:-t
8-}
0 التعليقات: